الأربعاء، 2 مايو، 2012

التعامل مع الأركيت كهواية أو كحرفة - أولاً كهواية

بسم الله الرحمن الرحيم 

الموضوع النهاردة عن التعامل مع شغل الأركيت : هاتعامل معاه كهواية أو كمجال عمل ؟ 
ممكن بعض الناس يفكر إن مافيش فرق بينهم لكن أنا شايف إن الفرق جبار .... ليه ؟ إن شاء الله هانتعرف مع بعض على شروط ومتطلبات وتكاليف الموضوع دة في حالة الهواية أو في حالة مجال العمل 

في حالة الهواية مش هايكون مطلوب من حضرتك حاجات كتير 
يعني هو نفس المطلوب إللي أنا كتبته في الموضوع السابق وهو كالآتي 
  • المنشار (طبعا) كهربائي أو يدوي 
  • سنون المنشار 
  • الدريل كهربائي أو يدوي 
  • كومبيوتر لاستعراض الباترونات - أو ستيكرات جاهزة 
  • البرنتر - مش شرط في حالة استعمال الاستيكرات أو ورق الكربون 
  • الأخشاب 
  • الباترونات 
  • بعض الأدوات المكتبية (صمغ - سلوتيب - قلم رصاص - مقص - ومشرط )


بس يا سيدي هو دة تقريبا كل اللي مطلوب عشان تبدأ العملية كهواية يعني أوضة صغيرة في البيت ، أو حتى ركن صغير في الأوضة تقدر تحط فيه الحاجات دي كلها (والموضع قابل للتعديل)  وهانتكلم باختصار عن إمكانيات المنشار في استعماله كهواية 

المنشار 
طبعا هاتشتري أي منشار مش شرط يكون في كل الشروط إللي قلنا عليها في الموضوع اللي فات ... عارف ليه ؟؟ لإنها هواية ... يعني حاجة إنت حاببها وبتشتغل فيها لمجرد المتعة فقط لا غير . هايكون تمنه حوالي من 500 إلى 800 جنيه في الرويعي ، أو ممكن تعمله عمولة عندي أي حد لو كان سعره أرخص . وممكن تشتغل بالمنشار اليدوي لو الحالة عدم ومافيش فلوس خالص حوالي 10 أو 12 جنيه 
أشكال مختلفة للمنشار اليدوي

 سنون المنشار 
متوفرة في أي محل حدايد وبويات وسعرها رخيص تقريبا 50 قرش للسلاح أو 75 قرش  


الدريل 
في دكاكين الحدادين بيعملوا حاجات عمولة بتكون رخيصة وكويسة ، أو ممكن تشتري واحد جاهز من الرويعي بأي سعر (أظن هايكون في حدود 200 أو 300 جنيه . والله أعلم ، أو ممكن تستعمل الدريل اليدوي 











أشكال مختلفة للدريل اليدوي 








الكومبيوتر 
غالبا هو موجود أصلا عندك يعني مش هاتحتاج تشتريه ولو مش موجود تقدر تشتري أي كومبيوتر بأي إمكانيات بس علشان تقدر تستغرض عليه الباترونات 


البرنتر 
برضه مش هايكون برنتر متطور ، يعني أبيض وأسود كفاية . وخليك فاكر إنك تظبط خيارات الطباعة على أقل استهلاك ممكن للحبر 


الأخشاب 
تقدر تجيبها من محلات النجارة وتكون فضلات الأخشاب اللي موجودة عندهم ، يعني مش لازم تشتري ، أو في أشد الأحوال تقدر تشتري لوح أبلاكاج فنلندي وخلاص 


الباترونات 
ودي طبعا موجود في كل مكان على النت ، بس كل اللي عليك إنك تكتب في جوجل scroll saw pattern وتضغط على كلمة (صور أبيض وأسود) هاتلاقي الدنيا كلها أدامك 
وخد الرابط دة على الماشي وعاين بنفسك 
https://www.google.com/search?q=scroll+saw+patterns&hl=ar&tbm=isch&prmd=imvnsb&source=lnt&tbs=ic:gray&sa=X&ei=r-ugT6LhAsHWrQfIva2OCQ&ved=0CBkQpwUoAg&biw=1236&bih=551
دة غير إنك ممكن تشتري بوسترات جاهزة من أي مكتبة وتلزقها وتشتغل عليها وفي الحالة دي مش هاتحتاج الكومبيوتر ولا البرنتر في حاجة 


أشكال مختلفة للاستيكرات


































وخد رابط الموضوع دة يمكن يفيدك 
http://forum.mn66.com/t336317.html


آدي كل المطلوب منك في الموضوع عشان تكون هاوي أركيت 
لو هاتشتغل يدوي هاتكون التكلفة تقريبا حوالي 30 جنيه ، أما لو هاتشتغل كهربا فهاتكون التكلفة حوالي (في حالة وجود الكومبيوتر أصلا في بيتك) حوالي من 700 إلى 1000 جنيه (الكلام دة كله تقريبي وقابل للتعديل طبعا) 
والتدوينة الجاية نكمل الموضوع كمجال عمل إن شاء الله 

هناك 4 تعليقات:

  1. انا أول مرة اتواصل من خلال مدونة وحزين جدا انك لم تكمل حوارك حول منشار الاركيت وكل ما يتعلق بموضوعك الشيق (الاركيت) واتمنى ان نتواصل اذا كنت مشغول عن اكمال موضوع المدونة من خلال الايميل الخاص بي sunworld.60@gmail.com علما بأننى اعمل خارج مصر وفى حاجة إلى نصائحك فى هذا المجال ولك منى جزيل الشكر والامتنان .

    ردحذف
  2. بارك الله فيك وياريت تقول لنا نجيب المنشار الكهربائي منين وبسعر قد إيه تقريبا

    ردحذف
  3. انت فنان يا ابو عهد والله ... ومجهودك خرافي في المدونة لكن للاسف انت بقالك سنة مبتكتبش خير ان شاء الله ؟؟ ... ياريت تكمل ارجوك لان الموضوع ده شيق وممتع جدا او على الاقل تسيب بيانات للاتصال بيك .. شكرا مرة تانية

    ردحذف
  4. كلام الله ينور عليه
    الصراحة انت دارس
    ياريت لو حضرتك بعتلي ادد علي الفيس ارجوك
    mark reda koko
    او اكتبلي اميلك هنا وانا هبعتلك ادد
    ولو من مصر سبلي نمرة تليفونك
    شكرا جدا

    ردحذف