الأربعاء، 2 مايو، 2012

التعامل مع الأركيت كهواية أو كحرفة - أولاً كهواية

بسم الله الرحمن الرحيم 

الموضوع النهاردة عن التعامل مع شغل الأركيت : هاتعامل معاه كهواية أو كمجال عمل ؟ 
ممكن بعض الناس يفكر إن مافيش فرق بينهم لكن أنا شايف إن الفرق جبار .... ليه ؟ إن شاء الله هانتعرف مع بعض على شروط ومتطلبات وتكاليف الموضوع دة في حالة الهواية أو في حالة مجال العمل 

في حالة الهواية مش هايكون مطلوب من حضرتك حاجات كتير 
يعني هو نفس المطلوب إللي أنا كتبته في الموضوع السابق وهو كالآتي 
  • المنشار (طبعا) كهربائي أو يدوي 
  • سنون المنشار 
  • الدريل كهربائي أو يدوي 
  • كومبيوتر لاستعراض الباترونات - أو ستيكرات جاهزة 
  • البرنتر - مش شرط في حالة استعمال الاستيكرات أو ورق الكربون 
  • الأخشاب 
  • الباترونات 
  • بعض الأدوات المكتبية (صمغ - سلوتيب - قلم رصاص - مقص - ومشرط )


بس يا سيدي هو دة تقريبا كل اللي مطلوب عشان تبدأ العملية كهواية يعني أوضة صغيرة في البيت ، أو حتى ركن صغير في الأوضة تقدر تحط فيه الحاجات دي كلها (والموضع قابل للتعديل)  وهانتكلم باختصار عن إمكانيات المنشار في استعماله كهواية 

المنشار 
طبعا هاتشتري أي منشار مش شرط يكون في كل الشروط إللي قلنا عليها في الموضوع اللي فات ... عارف ليه ؟؟ لإنها هواية ... يعني حاجة إنت حاببها وبتشتغل فيها لمجرد المتعة فقط لا غير . هايكون تمنه حوالي من 500 إلى 800 جنيه في الرويعي ، أو ممكن تعمله عمولة عندي أي حد لو كان سعره أرخص . وممكن تشتغل بالمنشار اليدوي لو الحالة عدم ومافيش فلوس خالص حوالي 10 أو 12 جنيه 
أشكال مختلفة للمنشار اليدوي

 سنون المنشار 
متوفرة في أي محل حدايد وبويات وسعرها رخيص تقريبا 50 قرش للسلاح أو 75 قرش  


الدريل 
في دكاكين الحدادين بيعملوا حاجات عمولة بتكون رخيصة وكويسة ، أو ممكن تشتري واحد جاهز من الرويعي بأي سعر (أظن هايكون في حدود 200 أو 300 جنيه . والله أعلم ، أو ممكن تستعمل الدريل اليدوي 











أشكال مختلفة للدريل اليدوي 








الكومبيوتر 
غالبا هو موجود أصلا عندك يعني مش هاتحتاج تشتريه ولو مش موجود تقدر تشتري أي كومبيوتر بأي إمكانيات بس علشان تقدر تستغرض عليه الباترونات 


البرنتر 
برضه مش هايكون برنتر متطور ، يعني أبيض وأسود كفاية . وخليك فاكر إنك تظبط خيارات الطباعة على أقل استهلاك ممكن للحبر 


الأخشاب 
تقدر تجيبها من محلات النجارة وتكون فضلات الأخشاب اللي موجودة عندهم ، يعني مش لازم تشتري ، أو في أشد الأحوال تقدر تشتري لوح أبلاكاج فنلندي وخلاص 


الباترونات 
ودي طبعا موجود في كل مكان على النت ، بس كل اللي عليك إنك تكتب في جوجل scroll saw pattern وتضغط على كلمة (صور أبيض وأسود) هاتلاقي الدنيا كلها أدامك 
وخد الرابط دة على الماشي وعاين بنفسك 
https://www.google.com/search?q=scroll+saw+patterns&hl=ar&tbm=isch&prmd=imvnsb&source=lnt&tbs=ic:gray&sa=X&ei=r-ugT6LhAsHWrQfIva2OCQ&ved=0CBkQpwUoAg&biw=1236&bih=551
دة غير إنك ممكن تشتري بوسترات جاهزة من أي مكتبة وتلزقها وتشتغل عليها وفي الحالة دي مش هاتحتاج الكومبيوتر ولا البرنتر في حاجة 


أشكال مختلفة للاستيكرات


































وخد رابط الموضوع دة يمكن يفيدك 
http://forum.mn66.com/t336317.html


آدي كل المطلوب منك في الموضوع عشان تكون هاوي أركيت 
لو هاتشتغل يدوي هاتكون التكلفة تقريبا حوالي 30 جنيه ، أما لو هاتشتغل كهربا فهاتكون التكلفة حوالي (في حالة وجود الكومبيوتر أصلا في بيتك) حوالي من 700 إلى 1000 جنيه (الكلام دة كله تقريبي وقابل للتعديل طبعا) 
والتدوينة الجاية نكمل الموضوع كمجال عمل إن شاء الله 

الاثنين، 30 أبريل، 2012

مشاكل وحلول حول استخدام المنشار الكهربي


بسم الله الرحمن الرحيم
أول حاجة عايز اتكلم فيها بصراحة هو إن المنشار اليدوي حاجة والمنشار الكهربي حاجة تانية خالص ، مافيش أي مقارنة بتاتا يا جماعة ، يعني بالمختصر كدة مايجيش واحد شغال بالمنشار اليدوي فترة طويلة وبأة عنده خبرة وماشي تمام ، وبعدين عايز يطور نفسه فراح اشترى منشار كهربائي وهو مفكر إنه جاب الديب من ديله . 
أشكال مختلفة للمنشار اليدوي
منشار أركيت كهربائي 
لا طبعا يا جماعة ، المنشار الكهربي موضوع تاني خالص ... هانتكلم حالا دلوقتي في كل حاجة 
طبعا أول ما الواحد بيشتري المنشار بيبقة متشوق جدا جدا عشان يستعمله ويقول دانا هاعمل كل حاجة وهاستعمل كل الباترونات وهاعمل وأسوي . 
وبعدين يحط المنشار على أي حاجة (طبلية مثلا ) ويروح يجيب أي حتة خشبة ويقوم جايب أي باترون أدام وشه وهوب يروح ملطخه بالصمغ ويروح لازقه ويبدأ يشتغل . 
طبعا النتيجة بتبأة مخالفة تماما للمتوقع ، وبتحس إنك اتخميت ، وعايز تمسك المنشار تكسره وترجع تستعمل اليدوي تاني وتقول إنه أحسن . 

تقريبا كل اللي حكيته من شوية دة حصل معايا بالحرف الواحد 
المنشار بتاعي ماركة Einhill
رحت اشتريت أي منشار لقيته ، وبعدين أول ما فتحته رحت مركب السن وجبت حتة خشبة وهوب .... لقيت كل أحلامي بتتحطم وكل تعبي راح على الأرض 
حسيت إني لو كنت استعملت سناني في تقطيع الخشبة كان هايبقة أحسن من المنشار دة . 

إحباط وغيظ وندم وضياع وحسرة وألم وحرقان ودوخة ومغص وإسهال وإمساك وتعنية وصداع وكرشة نفس . 
الله يخربيت المنشار على اللي شار بيه على ستيفن جود على الكل كليلة 
دة المنشار اليدوي ضفره برقبته ... أيه الشغلانة المهببة اللي أنا جبتها لنفسي دي . 
ما علينا 
تقريبا ركنت المنشار حوالي شهرين بدون استعمال وهو لسة جديد - تخيلوا - ... وبقيت كل ما شوفه أحس بالإحباط والغيظ والألم والوجع ... ألخ ألخ ألخ 

وبعدين بعد فترة بعدما ذهبت السكرة وجاءت الفكرة قلت أتفرج تاني على الناس اللي بيشتغلوا بيه يمكن يرجعلي الأمل مرة تانية 
والحمد لله فعلا 

لقيت إن في ناس وفي أمريكا نفسها شغالين بمناشير شكلها يجيب العار ومطلعين منها شغل زي الفل 
شوف الفيديو دة مثلا وشوف المنشار اللي الراجل شغال بيه عامل إزاي 

شفتو المنشار شكله عامل إزاي ... شكله يخض مش كدة ؟؟؟
عارف إن كتير منكم هايقول : "يا عم هو احنا لاقيين " ؟؟؟ 
وعارف إن كتير منكم هايقول : "والله دة منشار ممتاز ياريت عندي واحد زيه " 
أهو دة بالظبط اللي وداني في داهية 
وخليني أقولكو حاجة : ياريت نكون بنفكر على أساس إننا نرتقي بنفسنا ونطلع شغل على أعلى مستوى ... مش نكون راضيين بالأمر والواقع وخلاص علشان مش معانا فلوس كفاية .
خللي طموحك عالي ومتشيلش هم الرزق نهائيا وربنا هايكرمك إن شاء الله 
المهم .. نرجع لموضوعنا 
هاتكلم شوية عن الأسلوب الأمثل للتعامل مع المنشار وخصوصا لو انت مبتديء وماعندكش فكرة عن الموضوع ومشاكله 
وأحب أعرفكو يا جماعة إن شغل الأركيت فيه فنيات كتيييييرة جدا جدا أكتر مما تتصوروا وتتخيلوا 
يعني كل ما تيجي تشتغل في مشروع لازم تكون عارف إنت بتعمل ايه ... وتنشر فين الأول ، وتنشر إزاي ...
العملية ماهياش تقطيع خشب وخلاص ، العملية عايزة فن ولعب وهندسة
طيب ... حضرتك الحمد لله جبت المنشار وبفرض إنك جبته أي نوع وخلاص لأن مافيش إلا هو 
طبعا تحاول وانتة بتشتري المنشار إنك تجيبه بالمواصفات اللي اتكلمنا فيها قبل كدة ، لأن - صدقوني - هاتفرق معاك جدا جدا فرق زي السما والأرض 
هافترض إنك جبت منشار زي بتاعي كدة - فيه كل العيوب - وهافترض إنك مبتديء ،  وكمان هافترض إنك عايز تعمل شغل على أعلي مستوى بأقل التكاليف وتقدر تبيعه بأغلى سعر . 
طيب أيه الأدوات المطلوبة عشان أبدأ أشتغل 
1 - المنشار الكهربي 

2 - الشنيور الثابت (stand drill) اللي بنقول عليه بالعامية (متآب) وبالفصحى (مثقاب) 

أشكال مختلفة للشنيور الثابت
 ودة طبعا مهم جدا يا جماعة ، وأوعة حد يستهون بيه لأنه مهم زيه زي المنشار 
يعني وانت بتشتري المنشار لازم تكون عامل حسابك إنك هاتشتريه معاه 

3 - جهاز كومبيوتر أي حاجة حتى لو كان بنتيوم 2 

4 - برنتر عادي مش لازم يكون ألوان  
يعني الموضوع كله هايتكلف بتاع بالكتير أوي بتاع 350 دولار يعني حوالي 2000 جنيه تقريبا 
ملحوظة : ياريت تكون مخصص الكومبيوتر والبرنتر عشان الموضوع دة بس ، يعني ما تستعملش الكومبيوتر في حاجة تانية غير للموضوع دة بس 

خلاص جهزت كل حاجة ورصيتهم بالشكل اللي يناسبك ؟؟؟ تمام 
أولا : لازم تكون عارف إن كل منشار أركيت بيختلف عن غيره في حاجات كتير ، يعني ما ينطبق على منشار زيد ليس بالضرورة ينطبق على منشار عمرو ؟؟؟ فاهم كلامي ؟؟؟ 
يعني التعامل مع المنشار الدي والت يختلف عن التعامل مع المنشار الإكسكاليبور يختلف عن المنشار كرافتسمان 
دة معناه أيه ؟؟؟ 
معناه إنك لازم تذاكر المنشار بتاعك كويس أوي وتدرس مزاياه وعيوبه وتشوف أيه اللي ممكن تعالجه في موضوع العيوب وتخلصها . 
طيب ودة هايتم إزاي ,انا مبتديء وماعرفش أي حاجة ؟؟؟؟ 
هاقولك إزاي بس خليك صابر معايا 
ثانيا : إعداد مكان المنشار
1 - طبعا هاتحط المنشار في مكان ثابت غير معرض للإهتزازات أو الرجرجة ، يعني لو هاتحطه على ترابيزة مثلا ، لازم تكون الترابيزة متثبتة كويس على الأرض ، لأنك لو جبت أحسن وأغلى منشار وحطيته على مكان غير ثابت مش هايكون للمنشار أي لازمة ... خلاص ؟؟؟ واخد بالك ؟؟ الحمد لله 
2 - لازم تكون عامل حسابك إنه يكون في مساحة فاضية معقولة حوالين المنشار ، عشان لو هاتستعمل قطع كبيرة تكون مرتاحة وماتبوظلكش الشغل (الموضوع دة مهم جدا جدا) 
3 - بيئة الشغل : مهم جدا إن المكان يكون في تهوية كويسة ، ويا سلام لو في جنبك مروحة صغيرة عشان تطير تراب الخشب بعيد عنك لأنه مزعج جدا . 
مروحة مكتب
4 - تثبيت المنشار : 
افرش حاجة تكون تخينة على الترابيزة أو مكان وضع المنشار سجادة قديمة مثلا أو حتة موكيت قديمة أو أي حاجة تكون مناسبة ، وياسلام بأة لو كانت حاجة مطاط يبأة تمام التمام 
احرص على تثبيت المنشار بقوة في الترابيزة مع مراعاة وضع حلقات كاوتش مع الصواميل (ورد) زي الجلدة بتاعة الحنفية أو أنبوبة البوتاجاز بس تكون بالحجم المناسب لقاعدة المنشار 
بص بأة ركز معايا كويس أوي في الحتة اللي جاية دي 
خللي المنشار ما يكونش في وضع مستقيم على الترابيزة يعني خليه مايل لأدام ، يعني ارفع المنشار من الخلف شوية بحيث إنك لو حطيت عليه عملة معدنية على الواقف تلاقيها بتدحرج لأدام - خدت بالك ؟؟؟ 
شوف الصورة وأنت هاتفهم 

لاحظ درجة الميل للمنشار 


طب ودي لازمتها أيه ؟؟؟ 
دي ليها فوايد كتيرة جدا هانتكلم فيها بعدين 
وهختم لحد كدة ونكمل المرة الجاية إن شاء الله 
والسلام عليكم ورحمة الله وبركاته


أشهر أنواع المناشير الكهربية وأسعارها 2 - Craftsman

السلام عليكم ورحمة الله وبركاته 

المرة دي إن شاء الله هايكون الموضوع عن منشار Craftsman (كرافتسمان) وهو المنشار اللي موجود في الفيديو مع ستيفن جود واللي شاف الفيديو تقريبا هايكون عارف مواصفات المنشار دة . لكن على كل حال مش هانخسر حاجة وأهو نتعرف على السعر والقدرة والحاجات التانية . 

Craftsman 16'' Variable Speed Scroll Saw 21602

رابط الموقع الرسمي 
http://www.sears.com/shc/s/p_10153_12605_00921602000P 

مواصفات المنشار :

الموتور 120 فولت
الموديل : 21602
متعدد السرعات ( من 400 إلى 1600 في الدقيقة)
ارتفاع القطع 2 بوصة
زاوية ميل الصينية : 45 درجة لليسار فقط .
العمق 16 بوصة – حوالي 40 سم
نوع السلاح : بنز وغير بنز
الوزن : 38 رطل = 17 كيلو
يحتاج لآلة لتغيير السلاح (أنظر الصورة)
بلد الصنع : أمريكا
الحالة : متوفر .
السعر الأصلي : 113 دولار أمريكي 

السعر الحالي : 96 دولار شامل الشحن 
شامل : عدد 4 أسلحة للمنشار + آلان كي 

ودة رابط تحميل الكتالوج بتاعه
http://c.sears.com/assets/own/00921602e.pdf

الأحد، 29 أبريل، 2012

أشهر أنواع المناشير الكهربية وأسعارها Grizzly (جريزلي)

بسم الله الرحمن الرحيم 
إن شاء الله هابدأ مقارنة شاملة ووافية لكل أنواع المناشير المشهورة عالميا واللي بتستعمل في أوروبا وأمريكا وكندا.
أحب بس قبل ما أبدأ إني أعرفكم إن كل أنواع المناشير دي غالبا مش هاتلاقوها في مصر ، واللي عايز يشتري منهم لابد يشتري عن طريق النت واستخدام الفيزا كارد ، أو لو ما معاهوش كارت فيزا ممكن يروح مكتب من بتوع خدمات رجال الأعمال – بس يكون موثوق – وهو هايقوم باللازم .
ودلوقتي نخش في الموضوع
أول منشار معانا النهاردة يعتبر من  أرخص المناشير واسمه (جريزلي) Grizzly .



الموديل الأول : 
Grizzly 0536

منشار أمريكي الصنع معروف بلونه الأخضر زي ما هو في الصورة 

مواصفات المنشار :

  • الموتور 110 فولت
  • الموديل : G0536
  • متعدد السرعات ( من 540 إلى 1885 في الدقيقة)
  •  ارتفاع القطع بوصة وثمن بوصة – حوالي 3 سم إلا 2 مم .
  • زاوية ميل الصينية : 45 درجة لليسار فقط .
  • العمق 16 بوصة – حوالي 40 سم
  • نوع السلاح : بنز
  • الوزن : 35 رطل
  • لا يحتاج لآلة لتغيير السلاح
  • بلد الصنع : أمريكا 
  • الحالة : متوفر . 
  • السعر : 140 دولار أمريكي بدون مصاريف الشحن . 

ودة رابط تحميل الكتالوج بتاعه 
http://cdn0.grizzly.com/manuals/g0536_m.pdf

الموديل الثاني : 
G0734


http://www.grizzly.com/products/16-Scroll-Saw/G0734
  • الموتور 120 فولت
  • الموديل : G0734
  • متعدد السرعات ( من 550 إلى 1650 مرة في الدقيقة)
  •  ارتفاع القطع 2 بوصة  – حوالي 5 سم .
  • زاوية ميل الصينية : 45 درجة لليسار فقط .
  • مساحة الصينية : 10 بوصة عرض  16x بوصة وربع طول  
  • العمق 16 بوصة – حوالي 40 سم
  • نوع السلاح : بنز وغير بنز
  • الوزن : 36 رطل
  • مزود بلمبة 
  • شامل : علبة للسنون + سنون شنيور 
  • لا يحتاج لآلة لتغيير السلاح
  • بلد الصنع : أمريكا
  • الحالة : غير متوفر . 
  • السعر : 150 دولار أمريكي بدون مصاريف الشحن . 


الموديل الثالث : 


G0735
  
http://www.grizzly.com/products/16-Scroll-Saw-with-Flexible-Shaft-Grinder/G0735
  • الموتور 120 فولت 
  • الموديل : G0735
  • متعدد السرعات ( من 550 إلى 1650 مرة في الدقيقة)
  •  ارتفاع القطع 2 بوصة  – حوالي 5 سم .
  • زاوية ميل الصينية : 45 درجة لليسار فقط .
  • مساحة الصينية : 10 بوصة عرض  16x بوصة وربع طول  
  • العمق 16 بوصة – حوالي 40 سم
  • نوع السلاح : بنز وغير بنز
  • الوزن : 38 رطل
  • مزود بلمبة 
  • مزود بشنيور built - in بطول 42 بوصة - حوالي 107 سم بقطر الثقب 3 مم 
  • سرعة الشنيور : 3300 إلى 10000 لفة في الدقيقة 
  • شامل : طقم سنون + علبة للسنون + سنون شنيور 
  • لا يحتاج لآلة لتغيير السلاح
  • بلد الصنع : أمريكا
  • الحالة : غير متوفر . 
  • السعر : 170 دولار أمريكي بدون مصاريف الشحن . 


الموديل الرابع : 
H5698
http://www.grizzly.com/products/16-Scroll-Saw/H5698
  • الموتور 110 فولت
  • الموديل : H5698
  • متعدد السرعات ( من 550 إلى 1700 مرة في الدقيقة)
  •  ارتفاع القطع 2 بوصة  – حوالي 5 سم .
  • زاوية ميل الصينية : 45 درجة لليسار فقط .
  • مساحة الصينية : 10 بوصة عرض  16x بوصة وربع طول  
  • العمق 16 بوصة – حوالي 40 سم
  • الوزن : 38 رطل
  • مزود بلمبة 
  • لا يحتاج لآلة لتغيير السلاح
  • بلد الصنع : أمريكا
  • الحالة : متوفر 
  • السعر : 195 دولار أمريكي بدون مصاريف الشحن .
ودة رابط تحميل الكتالوج بتاعه : 
http://cdn0.grizzly.com/manuals/h5698_m.pdf



وأخيرا : جه دوري عشان أتكلم شوية 
طبعا أنا لو هاشتري هاشتري الموديل الثالث لأنه أعلى الإمكانيات وأرخص سعر 
وطبعا واضح جدا إن الموديل الثاني والثالث خلصوا ومش هايعيدوا إنتاجهم تاني عشان يقدروا يبيعو الموديل الرابع 
وطبعا ما فيش اختيار أدامنا غير الموديل الأول والرابع . 
وطبعا ماتقدش إن في حد ممكن يفكر يشتري الموديل الأول لأنه تعبان ومقرف كما هو واضح 
وبكدة أكون خلصت المراجعة الأولى في قائمة المناشير 
المرة الجاية هاعمل مراجعة على منشار تاني بكل الموديلات إن شاء الله 
والسلام خير ختام 
والسلام عليكم ورحمة الله بركاته












المواصفات القياسية لمنشار الأركيت الكهربائي



بسم الله الرحمن الرحيم 

دائما السؤال الذي يراود أي واحد فينا عن المنشار المناسب اللي ممكن يشتريه . وطبعا كل واحد فينا بيجاوب بما فتح الله عليه . فتلاقي اللي يقول دلتا ، وتلاقي اللي يقول دريميل . وتلاقي اللي يقول مش عارف أيه . واللي أنا لاحظته إن كل واحد بيوصف المنشار اللي عنده أو منشار شافه عند حد وكان نفسه يكون عنده واحد زيه . لكن بصراحة مالقيتش حد بيوصف منشار على أساس منطقي . 
يعني المفروض نحدد الأول الغرض من المنشار . هل المنشار هايكون لأعمال الزخرفة والتقطيع المعقد ولا هايكون لمجرد التقطيع فقط بدون استعمال المثقاب (زي أعمال الإنتارشيا أو الترصيع(المركتري) أو عمل البازل) ... ليه بقى ؟؟؟؟ خليك معايا شوية وإحنا إن شاء الله هانعرف ليه 

بداية زي قلت لازم تكون محدد بالظبط الشغل الرئيسي اللي هاتستعمل بيه المنشار . 

ممكن واحد يرد ويقول " هاستعمله في الأركيت .. أمال هاستعمله في أيه يعني ؟؟؟؟!!! في الحلاقة مثلا " . 

طبعا دة كلام لطيف وممكن يضحكنا شوية ونطلع كام إفيه وهاتك يا ضحك وتريقة 

طب تعالو كدة بسرعة نعرف المنشار ممكن نستعمله في أيه كشغل أساسي 

1 - شغل الترصيع (الماركتري) أو برضه اللي بنقول عليه (أرابيسك) .
أرابيسك صدفي 


أرابيسك خشبي (ترصيع)
ودة بيحتاج منشار أركيت بأدنى المواصفات يعني كل الحكاية عايز أي منشار بأي موتور بأقل سرعة وأقل سعر وخلص نفسك والسلام . لييييييييييييييه ؟؟؟؟. هاقولكو ليه 
لأن شغل الترصيع عبارة عن إنه بيقطع خشب قشرة أو بيقطع صدف من النوع الرقيق جدا جدا وطبعا بيقطعه حتت حتت يعني الباترون الواحد ممكن يكون متكون من ألف قطعة مثلا ، زيه زي البازل بالظبط . وبعدين يرص القطع جنب بعضها بالملقاط بعد ما يدهن السطح الرئيسي بالكلة وخلصت الحكاية . بس دة طبعا بياخد وقت ، لكن مش في التقطيع لأنه مش بيحتاج يفك السلاح ويركبه كل شوية ، ولا لأن السلاح بيتكسر لأنه بيقطع خشب قشرة في أغلب الأحوال ، ولكن في الرص جنب بعضها بالشكل والذوق المطلوب زي ما هو في الصورة . 

2 - شغل البوازل :
ودة طبعا للي عايز يشتغل شغل تجاري في لعب الأطفال أو ألعاب التركيبات ودة زيه زي المنشار اللي فات مش مهم المواصفات فيما عدا إنه بيحتاج إنه يكون الموتور بتاعه أقوي شوية عشان يقطع بيه الخشب السميك وطبعا مش بيحتاج فيه إنه يفك السلاح ويركبه كل شوية . 
باترون تقطيع البازل سهل وبيسط ولا يحتاج لشيء
3 - شغل النجارة بشكل عام :
ودة لأن ساعات النجار بيحتاج يقطع بعض القطع الخشبية بشكل فيه منحنيات فبيستعمل منشار الأركيت . وفي الغرب يا جماعة المنشار دة من المعدات الأساسية في أي ورشة لأن أغلب النجارين هناك بيشتغلوا في كل حاجة . يعني النجار منهم تلاقيه بيعمل أويما وأركيت وتدوير ونجارة ولعب أطفال ، وحتى القنبلة النووية . فلازم يجيب منشار الأركيت الكهربي وطبعا بتكون مواصفاته على مستوى عال لكن على مستوى السلاح والموتور لأنه غالبا بيتعامل بأسلحة من النوع السميك . 

4 - شغل الإنتارشيا :
إنتارشيا صدفة
إنتارشيا ذئب
وشغل الإنتارشيا زي ما حنا عارفين برضه زيه زي البازل عبارة عن حتت بتتلزق جنب بعضها بعد ما تتقطع وتتصنفر وتتدور وتتظبط وبعدين تتلزق جنب بعضها عشان تكون عبارة عن خليط بين الحفر على الخشب والأركيت وشغل الترصيع ، وطبعا في الشغل دة بيحتاج منشار عالي المواصفات جدا من حيث القوة والقدرة على تقطيع أصلب وأسمك الأخشاب وبيكون له مواصفات معينة برضه لأنه ساعات بيحتاج يقطع الخشب حتت صغيرة جدا فلازم تكون الصينية بتاعت المنشار قابلة للميل ولازم يكون المنشار قوي جدا ولازم تكون الفتحة اللي في مركز الصينية صغيرة جدا جدا (يعني يدوب تسمح بمرور المنشار من خلالها) وهانتعرف بالتفصيل الممل إن شاء الله في التدوينات القادمة على شغل الإنتارشيا إللي كله جمال وإبداع

5 - شغل الأركيت :
ودة طبعا الشغل الأساسي والرئيسي للمنشار ، والمقصود بالأركيت هو الشغل اللي فيه زخارف كتير وشغل معقد وحدوتة طويلة هانتكلم فيها بالتفصيل ، ودة الغرض من إنشاء المدونة في الأصل . طيب 
خلصنا رغي لحد كدة ؟؟؟ للأسف الشديد لسة شوية
تعالو بأة نتعرف على المواصفات المطلوبة والقياسية لأي منشار هانشتغل عليه شغل أركيت في الأساس ... خلاص يا جماعة اتفقنا 
طبعا الكلام اللي هاقوله بناء على الآتي : 
1 - التجربة الشخصية . 
2 - استفتاءات عملوها في الغرب . 
3 - استبيانات قامت بها المجلات والمواقع المتخصصة في الموضوع دة . 
يعني باختصار .
كلام                               موثق                                جدا 

1 - يأتي في المرتبة الأولي في مواصفات المنشار وبلا منازع ومن غير كلام ولا رغي ولا حكايات . موضوع إن المنشار مايكونش بيحتاج آلة لفك وتركيب السلاح (آلان كي أو مفك أو غيره)
لأن زي ما حنا عارفين يا جماعة إن الشغل بيحتاج إننا نفك ونركب السلاح كل شوية . ولما يكون شغل دقيق ممكن تحتاج تفك السلاح وتركبه حوالي ألف مرة (ودي مش مبالغة مني) . 

(اليسار) تركيب السلاح بواسطة آلة غير محبب
(اليمين) تركيب السلاح باليد أسهل وأسرع 
فلو اشتريت منشار بيحتاج آلة لفك وتركيب السلاح يبقة حكمت على نفسك إنك هاتشتغل شغل عادي مافيهوش دقة ولا إبداع أو لو حبيت تشتغل في حاجة تكون تمام فدة معناه إنك هاتعتكف عليها مدة طويلة . 

وطبعا من نافلة القول إنك بالقطع ومستحيل هاتعمل بيه شغل تجاري إلا إذا كنت متفرغ تماما ومايفرقش معاك الوقت
وأحب أعرفكم يا جماعة إن الموضوع مش مجرد إنك تفك السلاح وتركبه كل شوية ... لأ دة إنتة هاتلاقي المسمار بتاع السلاح هاينعم بعد فترة قصيرة وهاتحتاج تغير المسمار بتاعه كل فترة ، وبعدين لو المفك ضاع هاتتعطل لحد ماتجيب واحد غيره ، وطبعا الموضوع بيضيع وقت كتير أوي وبيسبب الملل والزهق وتضطر تسيب الشغل اللي في إيدك وتكمل بعدين (الكلام عن تجربة والموضع دة كان هايخليني أنسف الموضع من أساسه ومافكرش فيه تاني ، وكل دة بسبب فك وتركيب السلاح كل شوية) 


2 - يأتي في المرتبة الثانية موضوع قبول المنشار لكل أنواع الأسلحة :
لأن في أنواع مش بتقبل غير المنشار اللي فيه سن بالعرض من فوق ومن تحت (بنسميه بالعامية بنز) والمنشار اللي بالنوعية دي ماينفعش للشغل الدقيق بتاتا . 

شكل السلاح الغير مطلوب - لاحظ نهاية السلاح 

شكل السلاح المطلوب - لاحظ نهاية السلاح

3 - ييجي بعد كدة موضوع الاهتزازات أثناء العمل (الفيبراشن)
لاحظ الفرق بين درجة الاهتزاز في الصورتين
ودة طبعا موضوع مزعج جدا لأنك بتحس بعد مابتخلص إن جسمك كله مشحون كهربة وعمال ترتعش وإيدك بتزن ودماغك بتوش ، دة غير إنك لازم تكون ماسك الخشبة بكل قوتك وانتة بتشتغل لحد ما حيلك يتهد . 
دي الحاجات الرئيسة اللي لازم تكون منتبه ليها في الأساس وانت عايز تشتري منشار تشتغل عليه وانت مستمتع ومايكونش متعب ، والأهم من دة كله إنه مايبوظلكش الشغل . 
هانتكلم دلوقتي عن بعض المواصفات الفرعية اللي لو اتواجدت في المنشار اللي هاتشتريه فدة يكون أحسن وفي صالحك أو حسب مزاجك وحسب شغلك وطريقة عملك 

أ - موضوع عمق المنشار :
كلما كان عمق المنشار أكبر كلما كان أفضل
في الأعلى 22 بوصة وفي الأسفل 14 بوصة
ودة طبعا معناه إن كل ما يكون عمق المنشار كبير كل ما تقدر تعمل شغل أكبر . وكل المناشير القياسية بتكون مقاس 16 بوصة ، لكن في مناشير بتكون 14 و 18 و 21 و 22 و 26 و 30 بوصة . 

ب - موضوع قبول المنشار لفك وتركيب السلاح من تحت مش من فوق :
لاحظ طريقة تركيب السلاح
على اليمين الفك من أسفل والإدخال من أعلى وهو المستحسن
على اليسار الفك من أعلى والإدخال من أسفل وهي الطريقة المعتادة
لأننا كلنا عارفين يا جماعة إنك علشان تفك السلاح بتفكه من فوق وبعدين تدخل السلاح في الثقب اللي في قطعة العمل من تحت وبعدين تركب السلاح تاني من فوق : بتظهر المشكلة هنا إن لما بتكون شغال في قطعة كبيرة أو فيها فتحات كتير إنك بتاخد فترة على ما بتلاقي الثقب المطلوب وتقعد تدور عليه ، وبرضه بتكون مشكلة ساعة ما تيجي تدخل السلاح في الثقب لأنك بتضطر تثني السلاح بطريقة حادة شوية ممكن تتسبب في كسر السلاح (ودة حصل معايا كتير جدا) . 
اتفرج على الفيدو دة عشان تفهم قصدي 
http://www.youtube.com/watch?v=gG2CiH8bbtk
لكن لما بيكون المنشار فيه الميزة دي بتقدر إنك تفك السلاح من تحت وبعدين تدخله في الثقب المطلوب من غير ما تحرك قطعة العمل بتاتا وبيكون الثقب واضح أدامك وبتدخله بكل سهولة وبدون أي مشاكل . 

جـ - موضوع ميل الصينية :
كل المناشير الكهربية بها زاوية الميل للصينية
فيما عدا منشار الإكسكاليبور (على اليمين) الصينية ثابتة والسلاح هو الذي يميل
في أثناء الشغل (وخصوصا الشغل الاحترافي ) ساعات بتحتاج إنك تميل الصينية ، فبتلاقي الصينية بتميل شمال بس  ، أو شمال ويمين وبدرجات متفاوتة يعني مثلا ممكن يكون فيه منشار يقبل الميل شمال فقط وبزاوية 30 درجة فقط ، ومنشار تاني تلاقيه بيميل شمال 45 ويمين 30 . وطبعا الأحسن إنه يكون بيميل شمال ويمين بزاوية 45 . 
ملحوظة : كل مناشير الأركيت تقريبا بتقبل الميل شمال على الأقل للصينية ، ولكن منشار الإكسكاليبور هو الوحيد اللي السلاح هو اللي بيميل مش الصينية . 

د - موضوع السرعات المتعددة :
ودة معناة سرعة النشر وكل ما كانت السرعات في المنشار أكتر كل ما كان التحكم في الشغل أحسن ، ودة لأن في مناشير سرعتها ثابتة ، وطبعا بتكون سرعتها عالية ودة معناه إن لازم تكون عينك في وسط راسك وأنت بتشتغل لأنك لو سرحت جزء من الثانية فهاتعمل حاجة من اتنين : يا هاتعور نفسك ونبأة ارتحنا منك ، يا إما هاتلاقي الشغل اللي في إيدك بأة بلوظة . والكلام دة مخصوص بيكون في المناشير اللي معمولة عند النجارين والحدادين والفرارجية . 

هـ - موضوع الفتحة المركزية أو الغطاء البلاستيك اللي في الصينية إنها تكون قابلة للخلع والتركيب :
لاحظ الفرق
على اليمين غطاء بلاستيك قابل للخلع والتركيب (غير مستحسن)
على اليسار لا توجد هذه القطعة وإنما في الفتحة في الصينية ذاتها (مستحسن)
ودة طبعا معناه إنك عشان تجيب منشار كويس تجيبه ما يكونش فيه الغطاء البلاستيك المقرف دة ، هو صحيح ممكن تتعالج بكذا طريقة علشان تبأة ضيقة ، لكن من غير الموضوع هايكون أحسن ... الكلام واضح .... نعم ؟؟؟؟ مش واضح ؟؟!! غريبة دي . خلاص نقول تاني . 
بص للصينية بتاعت المنشار هاتلاقي في المركز بتاعها مكان مرور السلاح دايرة بلاستيك بتتخلع وبتتركب ... لأ يا باشا مش دة المطلوب ... المطلوب إنها ماتكونش موجودة من أصله ... عارف ليه ... أقولك ليه يا بطل . 
لأنك ساعات وانت بتشتغل تقوم البتاعة مخلوعة وتيجي في طريق السلاح ... عارف إيه اللي بيحصل ؟؟؟ ، بالظبط كدة الله ينور عليك ... السلاح بيتكسر . دة أولا . 
ثانيا لما بتكون بتقطع حتت صغيرة مش هاتعرف تتحكم فيها خالص غير لما تعمل ألاعيب شيحة ، وساعات القطعة اللي بتشتغل فيها بتلاقيها وقعت منك في الفتحة دي وتقعد تدور عليها لما تزهقك في عيشتك . وطبعا الموضوع دة بيحتاج تدريب عشان تعرف تتعامل مع القطع الصغيرة في وجود الغطاء البلاستيك المقرف دة . وعلى فكرة دة من الأسباب الرئيسية اللي بيكسر الشغل 
لكن في ناس بتفضل إن الغطاء دة يكون موجود وبعدين يتعالج بتضييق الفتحة ، والسبب : إنهم بيقولوا إن الغطاء دة ممكن نعالجه ونضيق الفتحة بتاعته لكن لو مش موجود وكانت الفتحة في الصينية نفسها ، فإن الفتحة دي مع الوقت وكثرة الاستعمال بتوسع وبتكبر ومش بتتعالج إلا بطرق معقدة
على كل حال الموضوع راجع لطريقة شغلك ، لكن أنا عن نفسي باكرهها جدا . 


و - موضوع القطعة المعدنية اللي بتثبت قطعة العمل أثناء النشر .
 وطبعا دي بتكون مفيدة للمبتدئين وبتكون متوفرة في أغلب المناشير ، لكن المحترفين مش بيهتموا بيها خالص ، بل بالعكس لما بتكون موجودة بيفكوها من المنشار ويستغنوا عنها لأنها مش بتخليهم يعرفو يمسكو الخشب كويس ... (امسكو الخشب يا خواننا) 
طبعا وجعتلكو دماغكو لكن هو دة المطلوب بالظبط . (وهو إني أوجع دماغكو) افهموني صح أرجوكم 
ممكن واحد فلحوس يقوللي : "طب ومش هاتقول بأة أيه المنشار اللي بتتوفر فيه كل المواصفات القياسية اللي رغيت فيها من شوية ؟؟" 
طبعا الرد هو : إن شاء الله في التدوينة اللي جاية (في المشمش ويحيينا ربنا) هاعمل زي المجلة ما عملت وأحط كل أنواع المناشير المعروفة ومواصفات كل واحد وتمنه التقريبي وشوية معلومات عنه . وتصبحوا على خير وكل سنة وأنتو طيبين 
ودة الفيديو بتاع ستيفن جود بيتكلم فيه عن المنشار وإزاي تختاره ومش عارف أيه 
طبعا الفيديو جزئين بالإنجليزي لكن أنا إن شاء الله في القريب العاجل هاجمع الجزئين في ملف فيديو واحد وهاضغطه لمساحة معقولة وأعمله مونتاج عشان احذف المقدمة والنهاية . والمفاجأة إني إن شاء الله ناوي أترجمه (عشان ماكونش حارمكو من حاجة) 


ودة الفيديو بالكامل بعد دمجه وضغطه وحذف المقدمة المزعجة
http://www.mediafire.com/download.php?brz49faz9j4o8ii

والسلام عليكم ورحمة الله وبركاته 

السبت، 28 أبريل، 2012

السلام عليكم جميعا ورحمة الله وبركاته


السلام عليكم جميعا ورحمة الله وبركاته
في الحقيقة راودتني هذه الفكرة منذ فترة طويلة وهي أن يكون لي مدونة خاصة بي أدون بها أفكاري الأركتية والخشبية خصوصا وأني أعتبر نفسي (معلش اصبروا بس عليا) مش هانقول خبير ولكن أعرف بما يكفي
وللأسف الشديد - على حسب علمي - لا توجد مدونة خاصة بهذا الموضوع (موضوع الأركيت والمشغولات الخشبية) أو موقع خاص (باستثناء منتدى المجال الصناعي) تكون خاصة بالكتابة في هذا الموضوع الممتع والشيق والذي به خبرات وأفكار كثيرة جدا
إن شاء الله سأنقل كل أفكاري وخبرتي وما قرأته وعرفته من الكتب والمدونات الإنجليزية - وهي المصدر الأول لي - وأترجمه . وإن شاء الله نستفيد سويا .
فعلى بركة الله نبدأ
عنوان المدونة
www.abu3ahdscrollsaw.blogspot.com